"လူသေဟာ လိမ်မပြောဘူး"

 

ရာသီဥတုဟာ လျှပ်ကူးပစ္စည်းပဲ

ထိတွေ့မိသူတိုင်း အေးစက်နာကျင်နေပုံ

စင်ပေါ်ကနေ စာအုပ်တွေ

မျက်ရည်လို စီးကျနေတယ်

သေရင် အစကပြန်စရတဲ့ဂိမ်းတွေ မကစားချင်ဘူး

ပြသနာတွေက အသစ်ဖြစ်ပြီး

ကျမ်းစာတွေက အဟောင်းဖြစ်နေတယ်

ဒဏ်ရာအနေအထားကို စကားနဲ့ဘယ်လိုပြောမလဲ

အိပ်မပျော်တဲ့အကြောင်း မီးလောင်ပြာကျ

သတင်းစကားပေးလိုက်တယ်

အတိတ်မေ့ရောဂါသည်တွေဟာ

သူတို့နဲ့အရင်းနှီးဆုံးသူတွေကို အရင်စမေ့တတ်ကြတယ်

တိုက်ဆိုင်မှုတိုင်းဟာ အကောင်းတွေချည်းပဲ မဟုတ်ဘူး

ခေါင်းလောင်းတွေက မြည်ပြီးသွားပြီ

စကြဝဋ္ဌာရဲ့မှောင်မိုက်ခြင်းပါ

ဘုရားကိုမြင်မှ တရားကိုမြင်မှာ

မင်းကိုမမြင်ရရင်

ဘာကိုမှမမြင်တော့ဘူး။ ။

-ဇင်လင်းနောင်