"မင်းထွက်သွားတုန်းက"

မင်းထွက်သွားတုန်းက

အာဏာသိမ်းပြီးစ

ညနေ နေဝင်ရီတရောပေါ့

စစ်တပ် အိမ်ကိုလာဝိုင်းတယ်

မင်း အမေ ကြောက်လိုက်တာ

ကြက်သီးမွေးညှင်းထ

အသားတွေဆတ်ဆတ်တုန်ပေါ့

အိမ်သားတွေလည်း

ချောင် မှာဝပ်လို့

မင်းထွက်သွားတုန်းက

မင်းညီကို မင်းနဲ့ မှားပြီး

ရဲတွေလာဖမ်းသွားတယ်

နောက်ကျမှ တစုံတယောက်က

သူဟာ မင်းမဟုတ်ဘူးပြောလို့

သူ့ကို ပြန်လွှတ်ပေးလိုက်တယ်

မင်းထွက်သွားတုန်းက

မင်းညီမ

ဌာနဆိုင်ရာ အလုပ်ကောင်းကောင်း

တခုရဖို့ ကြုံတယ်

ဒါပေမယ့် 

နောက်ကြောင်း ရာဇဝင်လိုက်တော့

( သူတို့ အလို )

မင်းက ဆန့်ကျင်ရေးသမားဖြစ်နေတာနဲ့

မင်းညီမ ခန့်စာနဲ့ လွဲသွားတယ်

မင်းထွက်သွားပြီး

နောက်နှစ်တွေ

သူတို့ ငါ့ဆီ  ခဏခဏ လာတယ်

မင်းအကြောင်းလာစုံစမ်းတယ်

မင်းသတင်းတွေ လာလာမေးတယ်

နောက်ဆုံး

မင်းနဲ့ အခင် ဆုံး သူငယ်ချင်း ဘယ်သူလဲ

မင်း ရည်းစား ဘယ်သူလဲ

ဒါတွေကအစ

ငါ့ကို လာလာ မေးတယ်

တရက်

ငါလည်း စိတ်မရှည်တော့တာနဲ့

ဆရာတို့ရယ်

ဆရာတို့က ထောက်လှမ်းရေးတွေပဲ

သူဘယ်ရောက်နေမှန်း

ဆရာတို့တောင် မသိတာ

ကျွန်တော် ဘယ်လိုသိနိုင်မှာလဲ

ဆရာတို့ သိရင်လည်း

ကျွန်တော့် ပြောကြပေါ့

ကျွန် တော်လည်း

ကျွန်တော့်သား ဘယ်ရောက်နေတယ်

သိချင်တာပေါ့လို့

ဒီတည်းက

သူတို့ ငါ့ဆီ မလာတော့ဘူး

မင်းသတင်းလည်း မကြားရတော့ဘူး ။ ။

-လူအိမ်