သဲနာရီ

 

ဒုက္ခကိုပျားရည်ဆမ်းတာ

သစ်သီးကိတ်တလုံးဖြစ်မလာပေမဲ့

ချာလီချက်ပလင်မျက်ရည်ကျတော့

လူတွေကရီကြတယ်။

တကယ်မငတ်ဖူးခင်တုန်းကတော့

ဖိနပ်ကိုစွတ်ပြုတ်လုပ်သောက်တာ

ရီစရာပေါ့အချစ်ရယ်၊

မြစ်ဟာ တံတားအောက်မှာ ပြန်ကွေ့ဖို့မလွယ်

နာကျင်မှုမှာ ပိတ်ရက်မရှိ

ပျော်ရွှင်ဖွယ်ကောင်းသော ဖုန်းမမြည်၊

ဟယ်လင်

မင်းပဲမှားသလား၊ ငါပဲမှားသလား

စစ်ပွဲကတော့ဖြစ်ခဲ့ပြီ။

-နှင်းခါးမိုး