ကျွန်ုပ်တို့၏ မညာသောနှလုံးသားဖြင့် တွေ့ရှိချက်-

(၁)

ခုလိုကာလ

ခဏတော့နေပါစေ

နေအလာအလင်းဖြန်းရင်

နန်းဇာတိရုပ်ပေါ်လိမ့်မယ်။

ကျင်လုံ လို

အလိုတော်ရိဇာတ်ကောင်ကမှ

ကြည့်ရကောင်းပါသေးတယ် ။

(၂)

အခုတေလာ

ခေတ်အစားဆုံး

ဧရာမလှုပ်ရှားမှုဟာ

အစည်းအဝေးပါပဲ ။

ဒါလဲ

ရောဂါပဲ လို့

ငါ့ရဲဘော်ကပြောဖူးတယ်။

(၃)

ဒီကောင်က

ကြောင်တယ်

ဖောက်ပြန်တယ်...တဲ့။

ကျွန်တော်ဟာ

တော်လှန်တယ်

မှန်ကန်တယ်တဲ့

သတင်းပေး..နဲ့

မိတ်ဖွဲ့ခဲ့သူက

သူရသတ္တိကြီးမားစွာ

အခန်းမှာမရှိသူအား

စွဲချက်များ တင်ရဲ့။

စာစဖတ်ခါစ

အစည်းအဝေးတက်လေ့ကျင့်သူ

စကားပြောလေ့ကျင့်သူ

လူမမယ်တစ်စုဟာလည်း

ဟုတ်ပါတယ်... တဲ့။

ထောက်ခံပါတယ်တဲ့ ..

ဟန်နဲ့ပန်နဲ့ ထအော်တယ်။

(၄)

သြော်

ဇလုပ်ပြသံ

အပုတ်ချသံ

ပုတ်ခတ်သံ ခုတ်ဖြတ်သံများ

ရန်ကုန်မှာ

သံစုံမြည်ဟည်း

တော်လှန်ရေးကြီးတစ်ခုပေါ့လေ။

(၅)

(၆)

ပါလီမန်ခေတ်

အသံချဲ့ဓါတ်ခွက်နဲ့

ဆက်သွယ်တဲ့အလုပ်

လုပ်နေသူတွေလဲ

လုပ်နေတာပါပဲ။

သူရဲကောင်းများ

စကားနှုတ်ဆိတ်

အလုပ်ကြိတ်လုပ်သွားခဲ့တယ်။

ငါဦးခိုက်ရှိခိုးမယ်။

(၇)

အို ..သူရဲကောင်းတို့

ခြေအစုံမှ

မြေတစ်မှုန်ကျန်ရစ်

အောင်ချိမ့် ဖြစ်တယ်။

တစ်လောကလုံး

အကျည်းတန်ဆုံးအရာဟာ

သစ္စာဖောက်မျက်ခွက်ဖြစ်တယ်။ ။

အောင်ချိမ့်

(ပန်းနုရောင်အိပ်မက် ကဗျာစုမှ)