ခြင်တစ်ကောင်အတွက် ကဗျာ

မင်းကို ငဲ့ညှာသနားတတ်ပြီး

ခွင့်လွှတ်နေတဲ့သူ(တွေ) ကို

နာကျင်အောင် ထပ်ခါတလဲလဲလုပ်ရင်..

မင်းခန္ဓာကိုယ်ထဲက သွေးတွေဟာ 

မင်းကို ပုန်ကန်စီးဆင်းလိမ့်မယ်။ 

.

အမှန်တရားဟာ နောက်ကျတတ်ပေမဲ့

တကယ်ရောက်လာမယ်ဆိုတာကတော့

သေချာတယ်။ 

.

လူဆိုတာ..

တလောကလုံးအပြင်

ဘုရားကိုပါ တက်ပြီး

ညာပစ်လိုက်လို့ရတယ်။

ဒါပေမဲ့..

မင်းကိုယ်မင်းတော့ ညာလို့မရ။ 

.

ဘယ်သူရေးတဲ့ကဗျာဖြစ်ဖြစ်

ဒုက္ခနဲ့ဆို ပိုလှလာမယ်

ပန်းပွင့်ကလေးတွေရဲ့ သဘာဝရနံ့ကို

ကမ္ဘာကျော်ရေမွှေးတွေကတောင်

အတုခိုးရတယ် ဆိုတာလည်း

မင်းမမေ့နဲ့။ 

.

“အိပ်လို့မပျော်ဘူး” ဆိုတာ

“စိတ်မပျော်လို့” ဆိုတဲ့ 

အကြောင်းအရင်းတင်မကဘဲ

မင်းစိတ်ထဲက..

အိမ်ရာမဲ့ပိုးမွှားတွေနဲ့လည်း

သက်ဆိုင်တယ်။ 

.

ဖြူစင်ယောင်ဆောင်နေလည်း

မင်းရဲ့အိပ်ခန်းထောင့်ကနေ..

တစ်စုံတယောက်က

မင်းကို တည့်တည့်စိုက်ကြည့်နေတယ်။ 

.

ကျိန်စာဆိုတာ..

စကားလုံးတွေသက်သက်ပဲမဟုတ်

မင်းရဲ့ဝှက်ဖဲကြောင့် ထိခိုက်ခဲ့ရသူရဲ့

နာကျင်မွန်းကြပ်မှုပဲ။ 

.

ဟန်ဆောင်လိမ်ညာမှုဆိုတာ

ခြင်တစ်ကောင်ပဲ။

ခုနှစ်ရက်ပဲ အသက်ရှင်နိုင်တယ်။

ဒီဇာတ်လမ်းမှာ…

ဘယ်သူက ဘယ်လောက်ဖြူစင်ခဲ့သလဲ

ဘုရားရိုက်တဲ့အခါ ပေါ်လွင်လာမယ်။ 

.

ဒီကမ္ဘာမှာ..

အဖြေဆီကနေ

လွတ်အောင်ထွက်ပြေးနိုင်တဲ့သင်္ချာပုစ္ဆာ 

မရှိသေးဘူးဆိုတာကိုတော့

ငါက အတိအကျယုံတယ်။ 

.

ကျော်ညိုသွေး