ချစ်သောတော်လှန်ရေး (springversion )
ဒီလိုနဲ့ ညိုညစ်ညစ်ပြဿဒါးရက်တွေကို ရောက်ရှိလာခဲ့
နဂါးခေါင်းက အရပ်လေးမျက်နှာ၊ အရပ်ရှစ်မျက်နှာကို
ပြိုင်တူကြီးလှည့်ထားတယ်
အနီရောင်တောက်နေတဲ့ လမ်းတွေမှာ
နောက်ဆုံးပေါ် တော်လှန်ရေးမျိုးစိတ်တွေ ရဲပဒေါင်းခတ်သွား။
၁၉ရာစု လက်ကျန် လူသတ်ဝါဒီတွေကို
ရ ရာ ရ ရာ လက်နက်တွေကိုင်စွဲလို့။
ဖေဖော်ဝါရီရဲ့ ဆံပင်နီကြဲကြဲနဲ့ ကောင်လေးဟာ
အစမှာ လက်သုံးချောင်းထောင်တယ်၊
တစ်ဆင့်မြင့်လာတဲ့ မတ်လ ဆံပင်နီကြဲကြဲလေးက
ဂျင်းပန်င်အစုတ်ဝတ်ပြီး ဒိုင်းကာကိုင်တယ်။
အခု G3ကိုင်ထားတဲ့ ဆံပင်နီကြဲကြဲကောင်လေး
မှတ်ပုံတင်မရှိ၊ဘွဲမရ ၊ဆယ်တန်းမအောင် ၊ ပစ္စည်းမဲ့။
လူတန်းစားအကြောင်းမသိဘူး။ ချေနဲ့မော်ကိုမသိဘူး။
ဖက်ဒရယ်ကိုမသိဘူး။
လစ်ဘရယ်တွေ ဖောက်ပြန်တတ်တာကိုမသိဘူးး။
ရွှေရောင်ဖုံးလွှမ်းသော ရက်များဆီက အပစ်ပယ်ခံ
ပေတေတေကောင်လေးဟာ အခုဖောက်ခွဲရေး ၊
အခုထောက်ပံ့ရေး၊ အခုတော့ တော်လှန်ရေး။
သူ့ကိုပစ်ပယ်သူ အထက်တန်းလွှာက
ရေပေါ်ဆီနိုင်ငံရေးသမားတွေကတော့
လွတ်မြောက်ရာတွေဆီမှာသူရဲဘောကြောင်စွာပုန်းခိုလို့။
ဘောင်းဘီတိုနှံ့နှံနဲ့ မိတ်ကပ်မလေးကနေ
ဟိုး ခေါင်းဖြူစုတ်ဖွား အဘိုးကြီးအထိ
လက်သီးကို ကျစ်အောင်ဆုပ်ပြီး
မကျေနပ်ခြင်းတွေကို အံကြိတ် ပေါက်ကွဲနေတယ်။
တကယ်တော့ချစ်သောတော်လှန်ရေးက ရက်စက်တယ် ။
ချစ်သောတော်လှန်ရေးက အဆင့်အတန်းခွဲတယ်။
ချစ်သောတော်လှန်ရေးက မာယာများတယ်။
ချစ်သောတော်လှန်ရေးဟာ မပြီးမြောက်ခင်ကာလမှာ
လူသားသိပ်စားတယ်။
ငါတို့ရဲ့
ချစ်သောအလုပ်သမားတွေ ၊
ပစ္စည်းမဲ့လူတန်းစားတွေ ၊
ကဗျာဆရာတွေ ၊
ကျောင်းသားလူငယ်တွေ
အမျိုးသမီးငယ်ငယ်တွေ
သက်ကြီးရွယ်အိုတွေကို
တဖြုတ်ဖြုတ်ချွေသွားတယ်။
ငါတို့မှာ 'နှောင်ကြိုးမှ တစ်ပါးအခြားမရှိ'လို့အော်ပြီး
တစ်ယောက်ရဲ့ဆက်ထုံးလေး ပြတ်ကျသွားမှာကို
တစ်ယောက်က စိုးထိတ်နေရ။
ငါတို့ ရရှိခဲ့တာတွေက များလွန်းလို့
ဘယ်ဒဏ်ရာက ပိုနာမှန်းမခွဲခြားတတ်တော့ဘူး။
ဒီလိုနဲ့ငါတို့အော်ကြတယ် ၊
ငါတို့ ငိုကြတယ်
ငါတို့ဆူကြတယ်၊ ငါတို့ လက်နက်ကိုင်ကြတယ်
ငါတို့ ကဗျာရေးပြီးစစ်တိုက်ကြရမယ်
ငါတို့ မသေမချင်း (ဒါမှမဟုတ်)
ချစ်သောတော်လှန်ရေးကြီး မပြီးမချင်း ။ ။
- PlugX
Done
ReplyDeleteDone!
ReplyDeleteDone!
DeleteDone
ReplyDeleteFighting
ReplyDelete