အရှေ့ဘက်စစ်မျက်နှာ

ကတုတ်ကျင်းထဲမှာ

စိတ်ကူးယဉ်ခွင့်မရှိ

ရွက်တိုင်ထိပ်မှာ

အရိုးခေါင်းပုံ အလံလွှင့်ထားရင်

ပင်လယ်ဓားပြပဲ

တချို့က

အမှန်တရားကို အလောင်းဖျောက်ပစ်တယ်

တချို့က

သစ္စာတရားကို အလောင်းပြန်ဖော်တယ်

ဘိန်းစားတစ်ယောက်မှာတောင်

မျှော်လင့်ချက်ရှိသေးတာပဲ

ကိုယ့်တိုင်းပြည်

မီးလောင်နေတာကို ထိုင်ကြည့်နေရတာလောက်

ရာဇဝတ်မှုမြောက်တာ ရှိပါ့မလား

မီးသတ်ကားတစ်စင်း

ဖြစ်ချင်ပါတယ်

ကိုယ့်ဘဝနဲ့ကိုယ် 

သစ်ရွက်တွေကြွေနေပါတယ်

ခရီးတစ်ခုရဲ့အကြောင်း

သံလမ်းများက ပြောပြပါလိမ့်မယ်။

ကြည်ဇော်အေး

8 July 21