ကဗျာကဏ္ဍ

 ဦးပုညရဲ့ လက်

ဦးနုရဲ့ လက်

မောင်သင်းခိုင်ရဲ့ လက်

လှသန်းရဲ့ လက်

လက်များရဲ့ လှပတဲ့အလက်ာ

ဘဝစာမျက်နှာသစ်

ငါ ချစ်တယ် ။

လက်ချည်းလာ လက်ချည်းဗလာ

ပြန်သွားကြသူတွေ ။

လက်ဆိုတာ

လက်ဆွဲနှုတ်ဆက်ဖို့

လက်တို့ခေါ်ဆောင်ဖို့

ကုန်ထုတ်မှုတိုက်ပွဲဝင်ဖို့

ကုန်ကုန်ဆိုပါစို့

ချစ်သူလက်နွေးနွေးလေးကို

ဆုပ်ကိုင်နိုင်ဖို့ ။

လက်ဆိုတာ

မိန်းမထဘီရုတ်ဖို့ မဟုတ်

လက်ညှိုးငေါက်ငေါက်ထိုးဖို့ မဟုတ်

လက်ညှိုးကွေးဖို့ မဟုတ် ။

လက်ဆိုတာ

ငါးမျှားဖို့သက်သက် ပါတာမဟုတ်

ဘုရားရှိခိုးပူဇော်ဖို့

လက်ဆိုတာ

လူတွေ မျက်ရည်သုတ်ဖို့

လက်ဆိုတာ

လူတွေ ပေးကမ်းစွန့်ကြဲဖို့ ။

လက်ဆိုတာ

ကဏန်းတွင်းနှိုက်ဖို့ မဟုတ်

လက်ဆိုတာ

ရွှေတွင်းတူးဖို့ မဟုတ်

လက်ဆိုတာ

သိုက်တူးဖို့ မဟုတ်

လက်ဆိုတာ

ပေသီးတွက်ဖို့ မဟုတ်

လက်ဆိုတာ

ဖုန်းနှိပ်ဖို့ မဟုတ်

လက်ဆိုတာ

လက်ဝါးဖြန့်ဖို့ မဟုတ်

အေး.  .   .

လက်သီးဆုပ်ဖို့လည်း မဟုတ် ။

စစ်ကြေညာဖို့လက်မှတ်ထိုးတာလည်း

ဒီလက်ပဲ

ငြိမ်းချမ်းရေးဆွေးနွေးလက်မှတ်ထိုးတာလည်း

ဒီလက်ပဲ

ချစ်သူတွေလက်မှတ်ထိုးလက်ထပ်တာလည်း

ဒီလက်ပဲ

လင်မယားတွေ လင်ခန်းမယားခန်း

ကွာရှင်းပြတ်စဲလက်မှတ်ထိုးတာလည်း

ဒီလက်ပဲ ။

ဂုဏ်တော်ကိုးပါး ပုတီးစိပ်တာ

ဒီလက်ပဲ

အဏုမြူဗုံးကြဲတာလည်း

ဒီလက်ပဲ

မိတ်ဆွေတွေ့ရင် လက်ပြနှုတ်ဆက်တာလည်း

ဒီလက်ပဲ

ရန်သူနဲ့တွေ့ရင် စီးချင်းထိုးတာလည်း

ဒီလက်ပဲ ။

ဘယ်လက်က ဆန်တစ်ဆုပ်ကြဲရင်

ညာဘက်က ဆန်လှည်းတစ်စီးဝင်တာလည်း

ဒီလက်ပဲ

မီးစတစ်ဖက်ရေမှုတ်တစ်ခွက်ကိုင်တာလည်း

ဒီလက်ပဲ ။

ပေးကမ်းတာလည်း

ဒီလက်

လုယူတာလည်း

ဒီလက်ပဲ ။

လက်ညှိုးညွှန်ရာ ရေဖြစ်တဲ့

အလောင်းစည်သူ လက်ကို

မလိုချင်ပါဘူး ။

ပြည်သူတွေကို

ဘယ်လက်က မျက်ရည်သုတ်ဖို့

ညာလက်က စွန့်ကြဲပေးကမ်းတဲ့

အနော်ရထာမင်းရဲ့ လက်ကိုပဲ လိုချင်တယ် ။      ။

အောင်ဘညို